Har fard ki ankhen nam hain yahan,kya shahar,qasbon,kya gaon mein,
Is nangi dhoop mein tap rahe sab,aas mein thandi chhaon ke,
Sab khade hain is sakht zameen pe,chhaalay pade hain paon mein,
Sari nigahen tujh pe tiki,ummeed mein badlao ke!
Haalaat ke saath samjhauta na kar,mat chhod sab taqdeer par,
Is nizaam ko badal daal,ek naye nizaam ki taa’beer kar,
In sayasat’danon ki bhid mein,rang bhar ek tasveer par,
Phir us tasveer ko wajood de,”Democratic League” ki taa’meer kar!
Humwatnon ko nijaat dilaa,tu is manzar-e-bepanaahi se,
In firqa-paraston ka takht palat,tu ikhlaq-o-ikhlaas shahi se,
Ye mulk ke pehredaar jo hain,mulk ki aabroo bech rahe,
In sayaasi pannon pe nayi nazm likh,tu apne aamaal ki syaahi se!
Utar ja is dayeray mein,tu kar sakta hai,kar guzar,
Apne noor ka jahan par,chhod ja kuch aisa asar,
Khatam ho ye syaah raat,ho khushiyon ki nayi seher,
Ugaa ja ek aisa aftaab,chamakta rahe jo taa’umar!
Bohot hua ye zulm sehna,karde ab baghaawat shuru,
Sayaasat ke umadte samunder mein,utaarde ab kashti-e-nooh,
Ibteda to achchi ki toone,Democratic League ke tasawwur se,
Ab apne farz ki adayegi kar,phook ke us tasawwur mein rooh,
Ab apne farz ki adayegi kar,phook ke us tasawwur mein rooh…….
